नेपाल प्रिमियर लिग (एनपीएल) को प्लेअफ दौड रोमाञ्चक बन्दै जाँदा बिहीबार कर्णाली याक्स र लुम्बिनी लायन्सबीच प्रतिस्पर्धा हुँदैछ।
कीर्तिपुरस्थित त्रिवि क्रिकेट मैदानमा साँझ ५ बजे सुरु हुने खेल दुवै टोलीका लागि महत्त्वपूर्ण हुनेछ।
आजको खेलमा कर्णाली नयाँ कप्तानीसहित मैदान उत्रिएको छ। सोमपाल कामीको स्थानमा दक्षिण अफ्रिकाका अनुभवी ब्याटर डेभिड मिलरले कर्णालीको कप्तानी सम्हालेका छन्। टस जितेका मिलरले पहिले ब्याटिङ गर्ने निर्णय गरेका छन्।
लिग चरणका खेल सकिन चारै टोलीका लागि अब दुई-दुई खेलमात्र बाँकी रहँदा प्लेअफमा पुग्ने समीकरण थप पेचिलो बनेको छ। यस्तो अवस्थामा आजको नतिजाले दुवै टोलीको प्लेअफ यात्रामा प्रभाव पार्नेछ।
लुम्बिनी अहिले ७ अंकसहित अंकतालिकाको तेस्रो स्थानमा छ। पाँच खेल खेलेको लुम्बिनीले तीन खेलमा जित निकालेको छ भने एक खेल वर्षाका कारण रद्द भएको थियो।
यता कर्णालीको प्रदर्शन भने अपेक्षाकृत राम्रो हुन सकेको छैन। पाँच खेलमध्ये दुई खेलमा मात्र जित निकालेको कर्णाली ४ अंकसहित सातौं स्थानमा छ।
प्लेअफमा स्थान सुरक्षित गर्न लुम्बिनी आफ्नो स्थिति थप बलियो बनाउन चाहन्छ भने कर्णाली बाँकी खेल जित्दै अन्तिम चारमा पुग्ने सम्भावना कायम राख्ने लक्ष्यमा हुनेछ।
त्यसैले आजको खेल दुवै टोलीका लागि अंक जोड्ने अवसर मात्र नभई प्लेअफको सम्भावना बलियो बनाउने निर्णायक प्रतिस्पर्धासमेत हुनेछ।
कर्णाली याक्स : डेभिड मिलर (कप्तान), सोमपाल कामी, गुल्सन झा, नन्दन यादव, दीपक डुम्रे, दीपेन्द्र रावत, विपिनप्रसाद शर्मा, पवन सर्राफ, अरिफुल इस्लाम, मार्क वाट, हुसैन तलत
